“Нийгмийн халамжийн дэмжлэг туслалцаа зайлшгүй шаардлагатай өрх, иргэнийг нийгэмшүүлэх, хамт олны бүлэг бүрдүүлэх, орлогын эх үүсвэртэй болох төсөл хэрэгжүүлэх, амьдрах ухаанд сургах” үйлчилгээний хүрээнд зорилтот бүлгийн 2 өрхийн 2 ба түүнээс дээш иргэн өөрсдийн санаачлагаар нэгдэн бүлэг болж орлогоо нэмэгдүүлэх зорилгоор төсөлд хамрагдах хүсэлтэй иргэдийн төслийг 2021 оны 03 дугаар сарын 11-ний өдрөөс 2021 оны 03 дугаар сарын 25-ны өдрийн хооронд хороо бүрт Хорооны хөдөлмөр эрхлэлт халамжийн асуудал хариуцсан мэргэжилтэн хүлээн авна.

Төслийг Хөдөлмөр, халамжийн үйлчилгээний хэлтсийн олон нийтийн оролцоонд түшиглэсэн халамжийн үйлчилгээний бүлгийн төсөл сонгон шалгаруулах ажлын хэсэг хянаж үзээд хэрэгжих магадлалтай төслийг 1.5 сая хүртэлх төгрөгөөр санхүүжүүлнэ.

Нэг. Төслийн хамрах хүрээ

Нийгмийн халамжийн олон нийтийн оролцоонд түшиглэсэн халамжийн үйлчилгээний бүлгийн зохион байгуулалттайгаар төсөл хэрэгжүүлэх үйлчилгээнд дараах өрх иргэн хамрагдана. Үүнд:

1. 1. 1. Ахмад настан
      2. Хөгжлийн бэрхшээлтэй иргэн
      3. Эрсдэлт нөхцөлд байгаа хүүхэд
      4. Хүчирхийлэлд өртсөн иргэн
      5. Хорих ангиас суллагдсан иргэн
      6. Согтуурах, мансуурах донтох өвчтэй иргэн
      7. Эдгэшгүй хүнд өвчтэй хүн
      8. Гэр оронгүй тэнэмэл амьдралтай өрх, иргэн
      9. Шилжин суурьшсан энэ хуулийн 3.1.2-т заасан өрхийн гишүүн-иргэн, иргэн
      10. Өрх толгойлсон эх /эцэг/
      11. Хөгжлийн бэрхшээлтэй хүүхэдтэй өрх.
      12. Гурав болон түүнээс дээш хүүхэдтэй өрх толгойлсон эх, эцэг

Хоёр. Төслийн үйл ажиллагааны чиглэл

Бүлгийн төсөл нь нийгмийн халамжийн тухай хуулийн 18.2-т заасан өрх, иргэнийг нийгэмшүүлэх, хамт олны бүлэг бүрдүүлж нөөц боломж, чадавхийг үнэлэх үндсэн дээр хөдөлмөр эрхлэх санаачилгыг нь тусгайлан дэмжих, өрхийн орлогыг нэмэгдүүлэх, орлогын тогтвортой эх үүсвэртэй болгоход чиглэгдэнэ.

Төсөл нь дараах чиглэлээр хэрэгжинэ. Үүнд:

1. Өрхийн үйлдвэрлэл /оёдол, гутал, гар урлал, уран зураг, ширэн эдлэл, эсгий, жижиг эдлэлийн үйлдвэрлэл/
2. Хүнсний үйлдвэрлэл /талх нарийн боов, сүү, сүүн бүтээгдэхүүн/
3. Газар тариалан /Хүнсний ногоо тариалах, хүлэмжийн аж ахуй эрхлэх, ногоо даршлах, мод тарих/
4. Хөнгөн үйлдвэрлэл /сүлжмэл эдлэл, ноос, арьс шир боловсруулах/
5. Барилгын материалын үйлдвэрлэл /блок, тоосго үйлпвэрлэл/
6. Гоо сайхан, үсчин, маникюр, педикюр

Гурав. Төсөлд бүрдүүлэх бичиг баримт

Нийгмийн халамжийн дэмжлэг туслалцаа зайлшгүй шаардлагатай өрх, иргэнийг нийгэмшүүлэх, хамт олны бүлэг бүрдүүлэх, орлогын эх үүсвэртэй болох төсөл хэрэгжүүлэх үйлчилгээнд бүрдүүлэх бичиг баримт. Үүнд:

1. Өргөдөл /Хорооны засаг даргын тодорхойлолттой, бүлгийн бүх гишүүд өргөдөлд гарын үсгээ зурсан байх/
2. Иргэний үнэмлэхний хуулбар /хүн тус бүрээр/
3. Төсөл нь батлагдсан загварын дагуу байх. /төлөвлөгөө, тооцоо, судалгаатай бизнесийн үйл ажиллагааны талаарх танилцуулга нь ойлгомжтой, тодорхой байх/.
4. Хөгжлийн бэрхшээлтэй иргэний хувьд Хөгжлийн бэрхшээлтэй хүний эрхийн тухай хуулийн 37.2 дугаар зүйлд заасан комиссын шийдвэр.
5. Хөгжлийн бэрхшээлтэй хүүхэдтэй өрх хамрагдах бол 16 насанд хүрээгүй хөгжлийн бэрхшээлтэй хүүхдийг тодорхойлсон эрүүл мэнд, боловсрол, нийгмийн хамгааллын салбар комиссын шийдвэр.
6. Хорих ангиас суллагдсан иргэний тухайд ял шийтгэл эдэлж байгаад суллагдсан тухай шүүхийн шийдвэр гүйцэтгэх газрын тодорхойлолт.
7. Гэр оронгүй тэнэмэл амьдралтайг судлан тогтоосон мэргэжлийн нийгмийн ажилтны нөхцөл байдлын үнэлгээ, тодорхойлолт.
8. Согтуурах, мансуурах, донтох өвчтэй иргэний тухайд холбогдох нарийн мэргэжлийн эмчийн буюу эмнэлгийн байгууллагын дүгнэлт.
9. Хүчирхийлэлд өртсөн иргэний тухайд хүчирхийллийн улмаас хамгаалалт шаардлагатай болсон тухай цагдаагийн байгууллагын тодорхойлолт эсхүл мэргэжлийн нийгмийн ажилтны нөхцөл байдлын үнэлгээ, тодорхойлолт.
10. Шилжин суурьшсан энэ хуулийн 3.1.2-т заасан өрхийн гишүүн-иргэн, иргэн. /Хөдөлмөр, нийгмийн хамгааллын сайдын 2018 оны 01 дүгээр сарын 22-ны өдрийн А/14 тоот тушаалаар Нийгмийн халамжийн тухай хуулийн 3.1.2-т заасан өрхийн гишүүн иргэнийг тодорхойлох босго оноог амьжиргааны түвшний үнэлгээний 409.679 оноо болон түүнээс доош оноо гэж тогтоосон./
11. Өрх толгойлсон эх /эцэг/-ийн тухайд нөхөр, эхнэрийн аль нэг нь нас барсан, эсхүл сураггүй алга болсон нь шүүхээр тогтоогдсон, гэрлэлтээ цуцлуулсан, эцэг, эх байх эрхээ шүүхийн шийдвэрээр хязгаарлуулсан, хасуулсан бол тухайн шийдвэр хүчин төгөлдөр байх хугацаанд, гэрлэж байгаагүй боловч төрүүлсэн болон үрчлэн авсан хүүхэдтэй ганц бие эх /эцэг/.
12. Эдгэшгүй хүнд өвчтэй хүний тухайд хүнд өвчин эмгэгийн улмаас төгс эмчилгээгүй болж, амьдралын төгсгөлийн шатанд орж, эмчилгээ авах бүрэн боломжгүй болсон мөн дархлалын олдмол хомстол өвчнөөр халдварласан болохыг тодорхойлсон нарийн мэргэжлийн эмчийн буюу эмнэлгийн байгууллагын дүгнэлт.
13. Бүлгийн үйл ажиллагаатай танилцсан хорооны хөдөлмөр, халамжийн асуудал хариуцсан мэргэжилтний илтгэх хуудас.
14. Хорооны амьжиргааг дэмжих зөвлөлийн хурлын шийдвэр.

Жич: Сүүлийн 3 жилийн дотор тус хэлтсээс төслийн санхүүжилт авч байсан иргэн, өрх, бүлэг нь үйлчилгээнд хамрагдахгүй болохыг мэдэгдье.

ХАН-УУЛ ДҮҮРГИЙН ХӨДӨЛМӨР, ХАЛАМЖИЙН

ҮЙЛЧИЛГЭЭНИЙ ХЭЛТЭС

Утас: 77171220